Shkup, 3 mars - Me më shumë aktivitete në Maqedoni deri më 8 mars shënohet Java e luftës kundër kancerit, i cili, sipas të dhënave të Organizatës botërore të shëndetësisë po bëhet një nga sëmundjet më shkatërrimtare në botë, me mbi 10 milionë raste të reja në vit.

Sipas të dhënave të Entit republikan për mbrojtje shëndetësore, në dhjetë vitet e fundit shkalla e rasteve të reja të regjistruara të të sëmurëve nga kanceri në Maqedoni është shtuar për 37,5 për qind. Hulumtimet më të reja tregojnë se numri i rasteve të reja të karcinomit po i afrohet numrit deri 6.000 në vit. Posaçërisht brengosës është fakti që po shtohet numri i personave të rinj të sëmurë, më të ri se 19 vjeçarë, tek të cilët po shënohet rritje në shkallën e sëumundjes nga 9,8 në 15 për qind në 100.000 banorë.