Santiago, 3 mars - Katër ditë pas tërmetit katastrofal me intensitet prej 8,8 ballë sipas Shkallës së Rihterit në Kili, ndihma humanitare ende nuk ka arritur deri te pjesët më të goditura të këtij vendi latino-amerikan, ku jetën e humbën pothuajse 800 persona.

Banorët e Konsepsionit, i cili është shkatërruar pothuajse tërësisht nga tërmeti, ende nuk kanë marrë kurrfarë ndihme, sepse kamionët me material humanitar nuk arrijnë deri te qyteti për shkak të procedurave burokratike dhe kolonave të gjata nëpër rrugë, të cilat çojn drejt tij. Autoritetet vendosën disa mijëra ushtarë, me mbështetje nga helikopterët dhe barkave, në pjesët më të goditura të vendit me qëllim që të përshpejtohet dërgimi i ndihmës.