Vetura që i mori jetën doli në shitje, sot protestohet: prokurorët e vrasin Almirin për të dytën herë

Në faqen e fejsbukit “Drejtësi për Almirin” është paralajmëruar për sot protesta e dytë kundër vendimit të prokurorëve për rikualifikim të lëndës nga vrasja me paramendim në aksident rrugor me pasoja vdekje, në të cilën u vra 4 vjeçari nga Kumanova, Almir Aliu, njofton Portalb.mk.

Protesta mbahet sot, e premte, me fillim prej ora 13:00 para Prokurorisë Themelore Publike në Shkup.

Derisa në rrjete sociale shpërndahej ngjarja për protestën e sotme, në anën tjetër, personi Boban Iliq ka nxjerrë në shitje “Mercedesin” me të cilin goditi për vdekje Almir Aliun.

Se bëhet fjalë pikërisht për veturën me të cilën u godit Almir Aliu, tregon edhe dokumenti i mëposhtëm ku shkruan se “Mercedes”-i me tabela të regjistrimit KU-0914-AD është vetura me të cilën është goditur Almir Aliu më 25 qershor të 2016-s.

Prokurori Joveski, në lidhje me këtë lëndë, ka deklaruar se vendimi për rikualifikim është marrë përpara se ai të emërohet prokuror, gjegjësisht në kohën kur funksionin e prokurorit skandaloz i afërt me VMRO-DPMNE-në, Marko Zvërlevski.

“Lënda gjendet në procedurë përpara Gjykatës Themelore. Përndryshe, përpara se të emërohem prokuror publik, në Prokurorinë e Lartë është bërë rikualifikimi i veprës, megjithatë tani rasti përsëri është në procedurë, gjegjësisht filloi nga e para, dhe do të veprohet sipas ligjit”, deklaroi Joveski.